Նորություններ

Մայիսի 13-15-ին Իրանի Շիրազ քաղաքի Abu Ali Sinai Charity Hospital-ում տեղի ունեցավ օրգանների փոխպատվաստման հերթական կոնգրեսը, որին առաջին անգամ ներկա էր մասնակից ՀՀ-ից՝ ի դեմս Աստղիկ բկ-ի ընդհանուր վիրաբույժ Հայկ Հարությունյանի։

«Աբու Ալի Սինա» հիվանդանոցը համարվում է Մերձավոր Արևելքի ամենահագեցած օրգանների փոխպատվաստման կենտրոնը։ Այն առաջինն է աշխարհում, որտեղ իրականացվել է օրգանների փոխպատվաստում՝ ուղեղային մահ արձանագրված դոնորներից։ Տարեկան իրականացվում է շուրջ 600-1000 լյարդի փոխպատվաստում, ինչը գերազանցում է նույնիսկ ԱՄՆ-ի ցուցանիշները։ Ի դեպ, փոխպատվաստումներ կատարվում են թե դիակային և թե կենդանի դոնորից՝ ինչպես մեծահասակներին, այնպես էլ մանկահասակներին։

Աշխարհում իրականացվող որևէ փոխպատվաստում չկա, որ այս անվանի հոսպիտալում չիրականացվի (լյարդ, երիկամ, սիրտ, թոքեր, աղիներ, ենթաստամոքսային գեղձ, մուլտիվիսցերալ կոմպլեքս օրգաններ, հյուսվածքներ, բջիջներ… և այլն): Օրգանների փոխպատվաստման ԵվրԱսիական-Իրանական կոնգրեսին ներկա էր շուրջ 500 մասնակից՝ ավելի քան 30 երկրից։

Առաջին անգամ էր Հայաստանը մասնակցում նման լայնածավալ կոնգրեսի։ Հայաստանն ու Աստղիկ ԲԿ-ն ներկայացնում էր Աստղիկ ԲԿ ընդհանուր և տրանսպլանտ վիրաբույժ, Լյարդի փոխպատվաստման թիմի կոորդինատոր, ԵՊԲՀ Ընդհանուր վիրաբուժության ամբիոնի դոցենտ, բ.գ.թ. Հայկ Վաչագանի Հարությունյանը։ Կոնգրեսի շրջանակներում զեկույցով հանդես եկավ Հայկ Հարությունյանը՝ ներկայացնելով Լյարդի փոխպատվաստման նվաճումները, մարտահրավերները և հեռանկարները Հայաստանում։

Զեկույցի վերջում հնչեցին գովեստի խոսքեր Տրանսպլանտ կենտրոնի ղեկավար, գիտական խորհրդի նախագահ պրոֆեսոր Սաման Նիկեղբալիանի կողմից, ով նաև պատրաստակամություն հայտնեց հետագա համատեղ ծրագրերի իրականացման համար։